Restaurantar og serveringsstader

Her finn du matopplevingar for einkvar smak.

Haaheim Gaard

På Haaheim Gaard er mat med historie og lokal forankring sentralt i alle gjestebod. Hotellet har eigen gartnar som skapar hagen om til eit matfat, kor ein kan hausta urter, grønsaker, frukt og bær. Kvart selskap vert sydd saman i lag med gjestene.

Vel mellom 3 rettars, 5 rettars eller 7 rettars meny, med mellom anna vin frå vinkjellaren, Haaheim sitt eige øl eller eplemost frå Hardanger.

Kokkane varierer menyen fra dag til dag.

Tlf: 534 33 000

Mandelhuset

EIN DESTINASJON PÅ TYSNES

Som ei kvit perle, rett ved sjøkanten i Våge, ligg Mandelhuset. Dei tre gamle kvite husa med grønt listverk på den gamle dampskipskaien var tidlegare ein landhandel og kai for fjordbåtane. No har staden blitt omgjort til ein lun og koseleg restaurant der kjøkenet bruker norske råvarer til å trylla fram gode matopplevingar for deg og dine.

Dagens eigarar har hatt drifta sidan 2005, men Mandelhuset blei til i 1995 etter at landhandelen la ned året før. Då hadde den vore i drift heilt sidan 1923.

Vertskapet si oppgåve er å vera ein god restaurant og møteplass på Tysnes, dei gjer sitt beste for at Tysnes skal vera ein god plass å bu og besøka. 

Tlf: 534 32 100

Kompasset Bar og Spiseri

Hos Kompasset Bar og Spiseri i Uggdal kan du nyta ein saftig burger på bryggekanten. Eller kanskje du vil prøva den populære rullekebaben deira? Is, slush og andre godsaker er også å få kjøpt her, og sola skin på uteserveringa til langt på kveld.

Kjem du med båt kan du leggja deg ved gjestebrygga.

Kompasset tilbyr også catering ved bestilling på førehand.

Tlf: 458 34 303

Myrdal gard

Det er eit must å besøka Myrdal gard når du er på Tysnes. Her får du kjøpt nydeleg pizza frå vedfyrt omn, med ei rekkje spanande ostar og smakar. Heimelaga tapas er også å finna på menykartet, om du vil ha noko salt og godt. Ta gjerne ein tur til Tysnessåto først, så smakar maten ekstra godt!

I gardsbutikken kan du elles la deg freista av lokalproduserte produkt som ost, yoghurt, iskrem, egg, kjøt og fersk bakst. Myrdal gard sel også syltetøy, saft og pølser frå andre lokalmatprodusentar.

Tlf: 955 28 264

E H Vaage landhandleri, bageri og dampskibsexpedition

Sjokoladefabrikk og lokalmatutsal i Uggdal, som berre må opplevast! Handelsplassen er i dag som eit levande museum, der ein kan sjå korleis ein handelsstad kunne vera for 100 år sidan.

E H Vaage har alltid mykje godt i hyllene - alt frå konfekt og makronar til heimelaga syltetøy. Er du heldig får du kanskje kjøpt ferske donuts eller anna bakst.

Ute er det sitjeplassar med flott sjøutsikt.

Tlf: 53 43 30 00 (Haaheim Gaard, driftar)

Laukhamar Fritid

Laukhamar Fritid på Skorpo serverer god tradisjonsmat, mellom anna rettar med sau/lam frå eigen produksjon. Ope for søndagsmiddag om lag to gongar i månaden (følg med på Facebook).

Utanom dei annonserte opningstidene tek vertskapet imot bestillingar på selskap og overnatting heile året. I det lyse og trivelege selskapslokalet er det plass til ca 70 personar.

Tlf: 993 31 168

Ivyelli

Kaffibaren hos Ivyelli har eit godt utval av deilig, nykverna kaffi som ein kan nyta inne eller «to go».

Her kan du også kjøpa deg noko søtt å bita i.

Flytenaustet

Som eit midtpunkt i hamna i Våge ligg Flytenaustet - Tysnes kommune sin turistinformasjon. Her er det både isbar, nysteikte vaflar og Tysnesfest-butikk.

Ope frå medio juni til medio august, tysdag-søndag.

Tlf: 53432100 (Mandelhuset, driftar)

Kafeen på OnarTun

Ein i utgangspunktet ubemanna kafe, der du kan forsyna deg av gratis kaffi. Du får også kjøpt deilig soft-is, berre ta kontakt med beteninga i Joker-butikken.

Kafeen er for alle, og er ein fin stad for å ta seg ein pust i bakken.

Tlf: 53 43 07 00 (Joker Onarheim)