Badeplassar.

På Tysnes finst det ei badevik for alle. Her er ei oversikt over dei best tilrettelagde badeplassane, samt nokre andre perler.

Kjevika

Idyllisk og vakker badebukt i med langgrunn strand. Området har sandvolleyballbane, baderampe for rørslehemma, benker og utedo. På graset er det perfekt å ta ein piknik, liggja og sola seg eller setja opp telt. Gang-avstand til Kompasset bar og spiseri.

Tilkomst: Parkering på bakketopp forbi Optimera (skilta). Deretter om lag 10 minutt å gå på grusveg.

Klubbavika

Svært flott friluftsområde med utsikt mot Onarheimsfjorden og vakre Kvinnherad-fjell. Den langgrunne stranda innbyr til både bading og leik for heile familien. Her er elles bord/benkar og utedo. Bakken ovanfor stranda er godt eigna for telting, og trea for hengekøyer. 

Tilkomst: Parkering ved Tveit bedehus. Derifrå er det 500 meter å gå på brei og fin veg gjennom skogs- og kulturlandskap. Rullestoltilpassa.

Våge hamn

Badebrygge med stupetårn i hjartet av hamna i Våge. Her ligg også Tysnes Fyrstove, og det er kort veg til leikeplass, Flytenaustet, Mandelhuset, butikkar m. m. Skiftebuer på land. 

Tilkomst: Det er gode høve til parkering i området, og kjem du med båt er det ikkje mange metrane å gå. 

Apalvika 

Offentleg friluftsområde sentralt ved byggefelta i Lunde. Her er volleyballbane/fotballbane, leikeapparat, gapahuk, grill, bålpanne og ordentleg toalett med vask. Frå stranda kan ein symja ut til ei badebrygge. 

Tilkomst: Det er parkeringsplass til nokre få bilar like ved området, nedanfor Apalvikvegen 10. Ein kan også gå frå Bunnpris (10-15 min).

Gunnarsvika

Skjerma badebukt ved innseglinga til Godøysund, med kort veg til Våge hamn. Her er fine svaberg, sandbotn og ei lita strand som høver godt for born. Utedo og båtfeste. Fleire telt-plassar og gode høve til å overnatta i hengekøye.

Tilkomst: Det er lettast å koma seg til Gunnarsvika frå sjøen.

Gjerstad

Fin lita sandstrand med skjelsand like ved småbåthamna på Gjerstad. Det er benk ovanfor stranda, og badebrygge nokre symjetak frå land.

Tilkomst: Køyr ned grusvegen bak Eviny sitt lager på Gjerstad, vis a vis Tysnes skule. Her kjem du til ein stor parkeringsplass. Deretter går du utover mot bryggeanlegget, og får snart stranda på venstre hand.

Fluøyane

Fluøyane er eit samleomgrep på ei gruppe øyer som ligg heilt nord i Tysnes, ikkje lange vegen frå Våge. Namnet Fluøyane blir også nytta om dei to nordlegaste øyene i øygruppa, og på Vestre Fluøy er det flott å ankra opp med båt og nyta strandlivet. Gode høve til telt-overnatting. Utedo.

Ver obs på at Fluøyane har status som naturreservat for å verna om hekkande sjøfugl, og at du perioden 15. april - 31. juli difor må halda deg innanfor eit avgrensa område (sjå skilt på staden eller søk opp kart hos Miljødirektoratet).

Tilkomst: Frå sjøen

OnarHamn

I båthamna til Alsaker Fjordbruk på Onarheim finn du det desidert kulaste hoppetårnet på Tysnes. Frå hamna er det gangavstand til OnarTun, der du blant anna kan kjøpa softis, ta sauna eller trena i Joker Onarheim sine opningstider.

Tilkomst: Det er gode høve til parkering i området, om du ikkje kjem med båt.

Kyrkjevatnet 

I nær tilknyting til dagsturhytta "Miklastofa”  i Uggdal er det laga til ein liten kai med rullestolrampe ut til badebrygge. Dette er eit flott område for å slå i hel nokre timar på ein finversdag. I kort avstand frå badeplassen er det gapahuk, bål-grue, toalettbygg og ikkje minst fine turmoglegheiter.

Tilkomst: Du kan parkera og gå frå Uggdalseidet (v. sørenden av vatnet, sjå skilt), i enden av Heningen (bakkentoppen forbi Optimera) eller frå ridebanen på Myklestad. Det er berre om lag 10-15 minutt å gå til badebrygga uansett kva veg du vel. Både Joker Uggdal og Kompasset bar og spiseri ligg i gangavstand frå friluftsområdet. 

Krabbapollen

Ei sjeldant flott perle for båtfolket, lokalisert ved Teistøy utanfor Lunde. Skjerma, grunn badevik med skjelsand i botn. Båtfeste, badestige og utedo.

Tilkomst: Frå sjøen

Årbakka Handelsstad

Den perfekte staden for å slå seg ned på nokre strandstolar medan borna badar eller leitar etter krabbe og fisk. Legg gjerne turen hit når Årbakka Handelsstad har ope, så kan du kjøpa vaffel og is innimellom soling og bading.

Tilkomst: Bruk Årbakka Handelsstad sin parkeringsplass. Herifrå er det berre knappe minuttet å gå til sjøen. Kjem du med båt kan du leggja til ved handelsstaden.

Pålsvika

Når du startar innseglinga mot Gripnesvågen frå Bjørnafjorden, får du denne fine badevika på høgre side. Ein herleg, usjenert plass med skog i bakkant.

Tilkomst: Me anbefaler tilkomst frå sjøen, ettersom det ikkje går noko merkt sti til Pålsvika. 

Jektevika

Dette er ein svært idyllisk badeplass på Neshamn med fleire strender å velja mellom.

Tilkomst: Køyr til endes av Neshamnvegen og parker før brua. Vidare er det viktig at du vel vegen me skildrar her, av omsyn til privat eigedom. Over brua møter du eit lite kvitt bygg med mange postkassar på, gå opp bakken bak dette (til høgre for kvitt, stort hus). Etter bakketoppen tar du ned til høgre ved ein ny bakke. Du får etter kvart ei blå hytte på høgre hand, og fortset vidare nedover. Snart er du i paradis.

Gåsholmane

Utanfor Skorpo og Flornes ligg ein liten oase av holmar og skjer, der sand-botn og grunne område innbyr til bading og rekreasjon.

Tilkomst: Med båt.